هاد الشي اللي واقع بين بنكيران وشباط ما بقاتش نافعة معاه العلوم السياسية باش يتشرح. ياك هوما يجوج كيعرفو للشعبوية، آجيو نتخايلوهم كيغنيو الشعبي. هوما كيديرو سياسة شد لي نقطع ليه، وبلغة الشعبي سياسة: حك جر… بحال الشعبي، بحال الشعبوية، الله يرزقنا غير شي حكومة مزيانة.
بنكيران، نقلا عن نجاة عتابو: أنا ما نويت فراقو، هو اللي دارها بي، انسحب ما قالها لي، والله حتى نبالي بيه. شباط، نقلا عن الستاتية: هانا غادي (غير سير) هانا غادي (غير سير)… هانا غادي للمعارضة، ونشوف ديك الحريرة، نجيبها ونجي… (غير سير). بنكيران، نقلا عن عبد العزيز الستاتي (ماشي أفتاتي): دابا دابا دابا دابا تندم علي، دابا دابا دابا يجرا لك ما جرا لي، وانت اللي سمحتي في، دابا تندم علي… شباط، نقلا عن زينة الداودية: انتايا واعر واعر انتايا ضونجي، الحكومة اللي ترأسها غادي نشونجي. بنكيران، نقلا عن عادل الميلودي: والو والو والو، ما كاين والو، حتى لعبة والو، المعارضة والو، الاستقلال والو، التماسيح والو، العفاريت والو… والو والو والو، حتى لعبة والو، من غير عبد الله بوانو… شباط، نقلا عن الشابة نبيلة: كل مرة نحلف عليه، ونقول غا ننساه، ونولي ثاني نفكر فيه… بنكيران، نقلا عن حجيب: يا الغادي للمعارضة، تعالى نوصيك بعدا، يلا وصلتي سلم، العفاريت لا تكلم… شباط، نقلا عن شي واحد: يا سيدي عبد الرحمان يا مول المجمر، جيتي بين المواج مقابل البحر… بنكيران، نقلا عن سعد المجرد: سالينا سالينا، من هاد التحالف سالينا، الله يعوض علينا…
إلى أن نلتقي في سهرة أخرى… تشاو تشاو…
