المهدي
الرمضاني غاندوي معاك بلغة موقع كيفاش يعني شرح ملح ما يخناز.
في الحقيقة السي الرمضاني كلامك فيه الصح من جهة ومن جهة فيه الرجولة لحقاش هذا جهدك على ضيف جبتيه أو ورطتيه بسؤالك بعدما كان نوض عليه النحل سنين هدي أو نساوها ليه المغاربة أو قالوا كيما قال بنكيران “عفا الله عما سلف”.
الإشكال السي الرمضاني ماشي في إمكانية أننا خاصنا نعتارفو ليك باللي “الشريبة” مهمة في اقتصاد البلاد لحقاش هادي ماشي نظرية ديالك بوحديك هادي راها جايا من كلام الله تعالى وربما كون سولتي السي الغزيوي كون قالها ليك راه عندو دراية فكلام الله، الله سبحانه وتعالى كيقول على الخمر {يَسْأَلُونَكَ عَنِ الْخَمْرِ وَالْمَيْسِرِ قُلْ فِيهِمَا إِثْمٌ كَبِيرٌ وَمَنَافِعُ لِلنَّاسِ وَإِثْمُهُمَآ أَكْبَرُ مِن نَّفْعِهِمَا} فلهذا راحنا متافقين على أن البيرة والويسكي فيهم النفع الاقتصادي لكن واش هذا مبرر؟
السي الرمضاني في سؤالك للسي دعيدعة ما سولتيهش السؤال كيفما هو بل سولتيه نصف سؤال لأن القانون اللي كان خرج باش يزيد في الضريبة على البيرة خرج أيضا باش ينقص من الضريبة ديال المواد الغذائية الأساسية أو هادي حاجة زوينة. أولا أسي الرمضاني؟
خاصك تعرف السي الرمضاني أني كنت من الناس اللي ما عجبمهومش الحال يسبو السي دعيدعة على داك الفيديو لحقاش هاداك رأي والرأي كيتحارب بالرأي فقط لا غير، و لكن بيني أو بينك عرفتي علاش كعاو على دعدعة؟
لحقاش بكل بساطة دخل الجامع والمنكر والدعوة لله وخلطها فواحد مولاتي الشلاضة مع البيرة ما نقولكش، لأنه بصراحة احنا عندنا في المغرب معروفة عند “المبليين” اللي دويتي عليهوم أنه اللي شرب الشراب 40 يوم ما كيقرب للصلاة والصيام لأنهم واخا عاصيين الله كايطلبوا من الله العفو ديما، أما السي دعيدعة إلى كان كيصلي العشا أو يمشي “يـ…”، فهذك حالتوا الخاصة ما يعممهاش أو فجميع الحالات الله يعفوا عليه.
المهم من هذا الشي كامل السي الرمضاني اللي جاتوا البيرة غالية يدير منها بناقص أو يسكر باللبن حتى هو كيبوق، أو لا يلوح 4 ديال الكرموسات فشي براد أتاي أو ها هو سكران فابور أو حلال على رأي دعيدعة.
