أكد بوشعيب المباركي المدرب السابق لنادي الشباب الرياضي السالمي واللاعب السابق لنادي الرجاء الرياضي، عن إمكانية تدريب الفريق الأخضر مستقبلا، بحكم أنه كان مساعدا للمدرب رشيد الطاوسي في وقت سابق.
وقال المباركي في حوار خاص مع “ميد راديو”: “أي واحد كيتمنى يكون مدرب ديال فريق الرجاء البيضاوي، وأي واحد مر من النادي ودخل لهاد الميدان ديال التدريب فراه كيحلم أنه يكون مدرب ديال الرجاء، ولكن الحلم كيبقى حلم والخدمة كتبقى خدمة”.
وأضاف المدرب السابق لنادي الشباب الرياضي السالمي: “باش تكون مدرب ديال الرجاء خاصك تشتغل على راسك بزاف، لأنه كاين فئة ديال الجمهور مكترحمش ومن حقهم، لأنهم دائما كيبغيو يشوفو الفريق ديالهم يكون متوج بأحد الألقاب فنهاية الموسم، أنا كنحس بداك الجمهور”.
وتابع حديثه قائلا: “منين كيخرج الفريق بصفر لقب راه خاصك تشوف الجمهور كاين شي ناس مكتخرجش، وكاين ناس اللي مكتبقاش تبان، كاين اللي كيتأثر بزاف، باش تكون مدرب ديال هاد الفريق خاصك تتشتغل على راسك بزاف، وأنت عارف طريقة اللعب اللي كيبغي الجمهور واللي معروفة بيه الرجاء، باش تكون على العارضة الفنية ديال الفريق خاصك بزاف الأشياء تشتغل عليهم”.
واستقال بوشعيب المباركي من منصبه كمدرب لفريق الشباب الرياضي السالمي بعد مرور خمس دورات فقط من بداية البطولة الوطنية الإحترافية،مبررا قراره بعدم قدرته على إعطاء المزيد من الأفكار للفريق.
