العرس ديال الفنانة المغربية لبنى أبيدار، اللي دارت، نهار الخميس (25 يوليوز) فمراكش، تبعوه انتقادات كبيرة لبطلة فيلم “الزين اللي فيك”، بحال إيلا دارت جريمة فحق الإنسانية!
الزوج “ديوث”
واحد المجموعة ديال الفضوليين هاجمو رجلها المصري وقالو عليه باللي ديوث، حيث تزوج بيها، وبداو كيدخلو فالحياة ديالو الخاصة، وكاين اللي وصلات بيه الوقاحة، يسول على الرقم ديالو الشخصي أو الحساب ديالو فالفايس بوك، باش يصيفط ليه لقطات من فيلم “الزين اللي فيك”، على أساس “بغا ليه الخير وما بغاهش يتصيد”.
استهزاء وسخرية
شي مبدعين فالفضول ما وقفوش غير فالتعاليق، وبداو كيحطو ترولات على الزوج ديالها، وباللي داروها بيه، بحال إيلا المراة طوموبيلا كتباع وتشرا، وخاص الواحد “يشريها” جديدة، وفيها كاع الأوصاف اللي كاينة.
وآخرين حطو صورتها مع رجلها، وبدلو ليه وجهو بصورة الفنان المغربي مصطفى تاه تاه والمعروف بعبارة “سانك سانك”، بينما منتقدين آخرين قارنوها بشكل غير منطقي بالممثلة الإباحية مايا خليفة، وقالو “منين تزوجات ميا خليفة، عادي لبنى أبيضار تتزوج”.
زوين عليها ما تستاهلوش!
وديما فإطار تشيئ الناس والمقارنة بيناتهم بشكل سطحي ومقزز، بعض المنتقدين هضرو على الشكل ديال زوج لبنى أبيدار، وقالو باللي هو “زوين عليها وما تستاهلوش”، بحال يلا الناس كيدار ليهم تقييم شكلي وخاص ضروري يكون تقارب فالشكل، ولا الزواج ما غاديش يكون مزيان، هادو نفسهم هما اللي كيهضرو على الأخلاق والقيم، وعايرو أبيضار بسبب أدوارها الجريئة.
أبيدار ترد
ومن بعد هاد الصداع كولو، لبنى أبيدار، قالت لموقع “كيفاش”، باللي وصلوها رسائل كثيرة، وفهاد الرسائل كانو ناس كيعايروها وبطريقة ساخرة.
وقالت: “بحال داك الشي اللي فالتعاليق عاود وصلني كرسائل، رجع عندنا واحد التنمر بشكل مغربي خاص، ما كيشبه لحتى ديال شي بلاد… رجلك زوين عليك، محال عرف شنو دوزتي، بحال هاد الرسائل الناس كتعطي لراسها الحق تحكم بلاصتي، والحقيقة ما عارفينش باللي رجلي عارف عليا كل شي، وعندو تلفوني والمايل ديالي، وحنا مفاهمين”.
وعلقت بطريقة ساخرة على المقارنة بينها وبين رجلها، وقالت: “رجلي زوين عليا، بصحتي، بقى فيهم حيث ما لقاوش رجل بوكوص شغلهم هداك”.
