شي مواقع جزائرية ومسؤولين عوض ما يطالبوا بمعاقبة المسؤول على التسيب الأمني اللي كان لبارح، الخميس (8 شنتبر)، في ملعب “عبد الكريم كروم” في الجزائر، اللي تلعب فيه النهائي ديال كأس العرب للناشئين، بين المغرب والجزائر، خرجو كيتهموا “أشبال الأطلس” باللي هما اللي اعتدوا على لاعبي أصحاب الأرض.
الكذوب على الحيين
أحد الصفحات الجزائرية نشرات فيديو من المدرجات، كيبانو فيه لاعبي الجزائر دوروا حارس المنتخب الوطني، وبداو كيضربو فيه، وأن “أشبال الأطلس” جاو من بعد باش يعتقو صاحبهم، ومع ذلك دايرين في العنوان “القصة الكاملة.. فيديو يوثق كل تفاصيل إعتداء المنتخب المغربي على لاعبي المنتخب الوطني الجزائري أثناء إحتفالهم”، وكن غير الفيديو فيه المونتاج بعدا يمكن يقبلو العقل، وهما حتى الكذب ما عرفوش ليه.
الاتحادية الجزائرية ضاربة طم
من جهة أخرى، الاتحادية الجزائرية لكرة القدم، اللي مسؤولة عن التنظيم، لحدود الساعة ما خرجات بحتى شي بلاغ، تقول فيه باللي غادي يتفتح تحقيق على شنو وقع، أو تفاعلت مع بلاغ الجامعة الملكية المغربية لكرة القدم، واللي نشراتو في الليل، وقالت فيه باللي غادي “تبع جميع المساطر القانونية”، بل الاتحادية الجزائرية دارت راسها ما على بالهاش بحال يلا ما سايقة خبار.
رئيس الاتحادية يتجاهل
زيد عليها المسؤول الأول على كرة القدم في الجارة الشرقية، جهيد زفزاف، لحدود الساعة ما قال والو، وحتى في التصريح ديالو لوسائل إعلام جزائرية اليوم الجمعة، بدا كيهلل ويشكر في التنظيم، واللي هو في الحقيقة كان كارثي بداية من الملعب فاش لعبو الفرق، واللي كيشبه لفدان بطاطا، وزيد عليها هادشي اللي وقع في النهائي، وانعدام وجود الأمن، ودخول حتى الجماهير لأرضية الملعب، وإصابة عدد من اللاعبين.
