في الوقت الذي يثار فيه الجدل بخصوص أداء واجبات شهر يوليوز، قررت بعض المؤسسات التعليمية الخصوصية إعفاء أولياء أمور التلاميذ من الأداء.
وحسب تقارير صحافية فإن مؤسسات تعليمية في كل من مراكش والرباط وطنجة، قررت إعفاء أولياء الأمور من رسوم شهر 7.
مبادرة زوينة
وفي تعليقه على الموضوع، قال نور الدين عكوري، رئيس الفيدرالية الوطنية لجمعيات آباء وأولياء التلاميذ بالمغرب، “هاد المؤسسات اللي قررو يعفيو الآباء من واجبات شهر 7 الله يجازيهم بخير، والمؤسسات اللي ما زال كنطلبو منهم حتى هما ياخذو المبادرة وكنتمناو يمشيو فنفس الاتجاه”.
وأضاف العكوري، في تصريح لموقع “كيفاش”، “وبالنسبة للمؤسسات التعليمية اللي غادي يشتغلو مع التلاميذ فشهر 7 فمن الواجب على الأسر يأديو ليهم، كيف قلنا الخدمة مقابل الأجر”.
وتابع العكوري “هاد المؤسسات فضلو أنهم ما يدخلوش فصراع مع أولياء الأمور، حيت ما يمكنش الأسر يأديو واحد الأجر ديال واحد العمل اللي ما كاينش، القراية ما كايناش فشهر 7 وآخر يوم فالمدرسة را هو 4 يوليوز، كيفاش بغيتو الأباء يخلصو”.
وشدد العكوري على أن “الوزارة هي اللي حيدات شهر 9، وهاد الشهر أصلا كيكون فيه غير التقويم والتشخيص ديال المكتسبات على التلاميذ، أما المقرر را كيبدى حتى لشهر 10”.
وواصل “هاد 10 شهور اللي كيهضرو عليها صحاب التعليم الخصوصي، را كانت ملي كتبداو فشهر 9 أما دابا المقرر بداوه مباشرة فشهر 10، وبغيتو تزيدو شهر 7 سيرو عند الوزارة قولو ليهم علاش نقستو شهر 9، را المقرر الدراسي هو اللي كيحكم ماشي المدة”.
وختم حديثه بالقول “كون الوزارة حبسو الامتحانات حتى يقراو الوليدات شهر 7، ديك الساعة را من الواجب على الأباء يخلصوه”.
قرارات فردية أم مجرد مزايدات !
من جهته، قال عبد الهادي زويتن، الرئيس الشرفي لرابطة التعليم الخاص بالمغرب، إن القرارات التي اتخذتها بعض المؤسسات التعليمية الخصوصية بشأن أداء رسوم شهر يوليوز، قرارات فردية، مشددا على أنها مجرد مزايدات دعائية.
وتابع زويتن، في تصريح لموقع “كيفاش”، “هادي ماشي قرارات ديال الرابطة ولا الهيئة، هادي قرارات فردية وحنا ما فهمناهاش”.
وأضاف “دابا المؤسسات الخصوصية يلا ما تخصلوش من عند الأباء في شهر 7 باش غادي يخلصو الأطر؟… أما هاد المؤسسات اللي دارو هاد الخطو اللي ما مفهوماش را كيكونو ما كيخلصوش الأطر ديالهم فشهر 7 و8 بالتالي الإدارة ما كيكونش عندهم مشكل بفهاد الشي”.
وبخصوص احتجاج الآباء على أداء واجبات شهر يوليوز رغم توقف الدراسة، قال زويتن في التصريح ذاته “حنا متفقين، ولكن اللي ما مفهومش أن الدراسة را ماشي هي الحصص اللي كدوز فالقسم صافي، الدراسة را منظومة، مثلا فاش هاد الوليدات اللي غادي يدوزو الامتحانات فشهر 7 شكون غادي يصحح ليهم، شكون غادي يدخل النقط فمسار را الأساتذة غادي يبقاو خدامين حتى يسالي الشهر”.
وشدد على أن “هادي معركة وهمية وغير مزايدات دعائية شي مدارس ربما ما عندهمش التلاميذ بزاف، مثلا واحد كان قال بلي ما غاديش يتخلص من التلاميذ فالأول ديال كورونا فشهر 3 و5، وفاش جينا نشوفو لقينا عندو 22 تلميذ، لذلك هاد الشي را غير دعاية لاستقطاب الناس”.
