محمد المبارك
لاعبو المنتخب المغربي اللي كاينين هاد سنة في مونديال روسيا 2018 فيهم 17 لاعب عندو جنسية ثانية، من بين هاد المجموعة كاين اللي لعب مع منتخبات أوربية، كل واحد عندو سبب علاش اختار المنتخب المغربي في نهاية الأمر.
بلهندة اختار المغرب بسبب تازة
يوسف بلهندة تدرج في الفئات ديال المنتخب الفرنسي، وفاش جات لحظة الحسم رفض المنتخب الفرنسي الأساسي رغم نصائح المقربين ليه باللي القرار ديالو خاطئ، ولكن قال باللي القلب ديالو لي اختار والارتباط ديالو بالجدة اللي كاينة فمدينة تازة هو السبب الرئيسي.
الأحمدي مغربي أكثر من هولندي
كريم الاحمدي، الملقب في هولندا بالملك الأحمدي، لعب مع جميع الفئات في هولندا، ولعب حتى مع المنتخب الأساسي، ولكن من بعد حس باللي الانتماء ديالو لمنتخب والديه ولعب مع المغرب.
بنعطية بلا فرصة مع فرنسا
من العجائب أننا نسمعو باللي المهدي بنعطية ما لقاش فرصة مع المنتخب الفرنسي، واللي كان دائما عندو مشكل فمركز قلب الدفاع، ولكن هادي حقيقة.
المهدي بنعطية لعب سبع مباريات مع المنتخب الفرنسي لأقل من 17 سنة، ومن بعد ما عاودوش عيطو ليه، فبقى عندو اختيار بين المنتخب المغربي أو الجزائري فاختار المنتخب المغربي بتوصيات من الأب ديالو.
كارسيلا مرضي ميمتو
مهدي كارسيلا واحدة من أغرب القصص، حيث كان عندو الحق يلعب مع إسبانيا لأن الأب ديالو إسباني، ومع المغرب لأن الأم ديالو مغربية، ومع بلجيكا حيث تولد فيها.
الوالدين ديالو بحكم أنهم مطلقين دخلو في نزاع على المنتخب فين غادي يلعب، مع العلم أن مهدي لعب مع جميع الفئات العمرية فبلجيكا وفي بعض المباريات الودية مع المنتخب الأساسي، ولكن في النهاية دار بداك الشي اللي قالت ليه الأم ديالو ولعب مع المنتخب المغربي!!!
الإخوة أمرابط ضمنو بلاصتهم فالمغرب
نور الدين امرابط لعب مع جميع الفئات العمرية في هولندا ولعب مع المنتخب الأساسي مباراة واحدة، ومنين شاف باللي المنتخب المغربي ضامن ليه اللعب اختار المنتخب المغربي. الأخ ديالو سفيان لعب مع الفئة ديال أقل من 17 سنة، وما عاودوش عيطو ليه فاختار المغرب.
زياش جا بالإصابة والقدر
حكيم زياش خدا أحسن لاعب في البطولة الهولندية مرات كثيرة فماشي غريب يعيطو ليه فالمنتخب. حكيم لعب في الفئات كاملين، وكان غادي مع هولندا مزيان حتى جات الإصابة اللي منعاتو يلعب إقصائيات كأس أمم أوروبا 2014، وتما راجع الحسابات ديالو واختار المغرب.
حارث بغا المغرب فتويتر
أمين الحارث من أحسن المواهب المغربية في هاد الآونة، لعب مع جميع الفئات في فرنسا وربح مع المنتخب الفرنسي للشباب بطولة أوروبا، وفاش جا المعقول جاوبهم في تويتر وقال بغيت المغرب.
كوستا المغرب بعد البرتغال وفرنسا
مانويل دا كوستا لعب مع شباب البرتغال وفرنسا وعيطو ليه في المنتخب الأساسي في البرتغال، ولكن دائما كاحتياطي، وبدات الصحافة المغربية كتضغط على المدربين، أولهم اريك غيريتس، ومن بعد جا بادو زاكي وقنعو يلعب للمغرب.
