محمد المبارك
المغاربة شعب النكتة والضحك، وحتى القوافي والقوالب، واحد المغربي مشا لروسيا وحالف حتى ياكل فواحد المطعم، ومنين لقاه عامر قاليهم شي هضرة خلاهم كيجيبو ليهم الطباسل يوقع فيهم. كيفاش؟
وتعود القصة إلى يوم الثلاثاء الماضي (19 يونيو)، فاش مشا واحد المغربي لروسيا مع العائلة ديالو باش يحضر كأس العالم، واتصل بواحد المطعم باش يشد طابلة ليه والعائلة ديالو ولكن قالو ليه باللي المطعم عامر كامل، وهو يقطع وعاود اتصل بيهم وقال ليهم أنا هو رئيس الحكومة المغربي سعد الدين العثماني وهما يشدو ليه أحسن بلاصة في ريسطو.
وفاش كلا هو والعائلة ديالو، وقع على طباسل وضرب صور تذكارية مع الناس اللي خدامين ومشا بحالو.
من بعد يومين، ولدو اللي عايش في أمريكا غادي يلوح فيديو وفتويتر كيبان فيه الأب ديالو وهو كيوقع وكيتصور مع الناس وغادي يكتب تدوينة يشرح فيها هاد القصة كاملة.
واختلفت الردود على تويتر، حيث كان اللي ضحك وقال باللي هاد المطعم يستاهل حيث دار الوجهيات، وكاين آخرين قالو خصو يتابع حيث دار انتحال صفة شخصية عامة.
