واحد الفيديو قبل عام دار البوز على مواقع التواصل الاجتماعي، فيه ناس كتجدب وكتاخذ “البركة” من أوراق أكناري اللي محطوطة وسط الساحة.
وقبل أيام، عاود انتشر فيديو جديد، وهاد المرة كان أكثر وضوحا، حيث الأغاني باللغة الأمازيغية، وجا تزامنا مع موسم عيساوة اللي بدا في مدينة تارودانت يوم الأربعاء الماضي (5 شتنبر).
وكيف الفيديو الأول، استنكر مجموعة من رواد مواقع التواصل الاجتماعي هاد الشي، وكاين اللي سماه تخلف.
وكتب أحد المعلقين: “2018 وهادشي مزال في المغرب، مصيبة صافي”. وكتب آخر: “هادشي كيكون كل سنة والناس كتسحاب باللي غادي يتشافاو من الأمراض بهاد الطريقة”.
ومن جهة أخرى، دافع بعض المعلقين عن الأمر، معتبرين إياه متوارثا عبر الأجيال، حيث قال أحدهم: “هاد المواسم كيعتبروا فرصة كيتجعموا فيها الناس من دواوير كثار وكيغنوا ويشطحوا وكاين اللي كيشوف عائلتو غير فهاد المواسم السنوية اللي كتكون”.
