من بعد ما خرجو الفيديوهات ديال الحفلة اللي دار واحد الكروب فايسبوكي وحضرات فيها الشيخة فاطمة الزهراء، المعروفة بـ”التراكس”، القضية كبرات والشيخة حطات شكاية عند البوليس. كيفاش؟
الشيخة التراكس طلعات فلايف فالفايس بوك البارح الثلاثاء (9 أكتوبر)، وقالت باللي رفعات شكاية عند البوليس تتهم فيها كروب “بروكلين” بالتشهير والسب والقذف وتلفيق أكاذيب كتسيء للسمعة ديالها، وقالت باللي هاد الكروب حاولوا يطيحوها في فخ ويستغلوا “النية” ديالها.
والقصة اللي وقعات بين كروب “بروكلين” والشيخة “تراكس” كترجع لنهار السبت اللي فات (6 أكتوبر)، فاش الفنانة حضرات لواحد الحفلة دارها هاد الكروب، ولكن الحفلة سالات بشكل خايب، حيث أكدت “التراكس” أن شي واحد من الحاضرين تحرش بها الشيء اللي خلاها تمشي فحالها.
ولكن المشكل غادي يبدا فاش تنشروا الفيديوهات وبدات كتخرج قصص كثيرة كتقول أن الشيخة “التراكس” حضرات لهاد الحفلة حيث كتسحابهم خليجيين، وهاد الشي كذباتو “التراكس” بالدلائل، وقالت أنها كانت عارفة من الأول باللي الحفلة تنكرية، وقالوا ليها من الأول غادي يلبسوا الزي الخليجي.
وفالنهاية، قررت الشيخة “التراكس” تسالي هاد الشي وما يبقاش صراعات على مواقع التواصل الاجتماعي وتختار طريق القانون مستغلة القانون الجديد، اللي كيعتبر التشهير على شبكات التواصل الاجتماعي جريمة كيعاقب عليها القانون.
