محمد المبارك
اللاعب الدولي المغربي المهدي بنعطية صاحب أحسن مشوار كروي في تاريخ اللاعبين المغاربة، حيث لعب في أندية كبيرة في القارة الأوروبية، وهاد الشي خلى مجموعة من الناس تعترف بقدرات اللاعب المغربي.
أول عرض من جوزيه مورينو
الكابيتانو المهدي بن عطية، والاسم الكامل ديالو هو المهدي أمين بنعطية المتقي، تزاد سنة 1987 في فرنسا، من أب مغربي وأم جزائرية، بدا المشوار الكروي ديالو في أندية صغيرة كناشئ، ودوز مدة قصيرة في المعهد الوطني للمواهب، ولكن خرجوه، وتما مشا لفريق غانغام وديك الساعة كان مازال صغير شافتو فرق كبيرة بحال مانشستر يونايتد، وكان بغاه جوزيه مورينيو بتوصيات من اللاعب الإيفواري ديديه دروغبا، ولكن بنعطية ما بغاش يحرق راسو أو ما قدرش يدخل في تجارب قد هاكاك واختار مارسيليا.
لاعب إعارة
سنة 2005، فاش انتقل لمرسيليا منين كان في عمرو 17 سنة، الفريق الفرنسي ما دارش فيه الثقة، بقاو كيصيفطوه إعارة لفرق كتلعب فالدرجة الثانية، على أساس ياخذ التجربة، وكان كل عام كتسالي الإعارة كيصيفطوه إعارة لنادي آخر، حتى طلقوه بصفة نهائية لنادي كليرمون عام 2008 اللي كيلعب في الدرجة الثانية. والغريب في الأمر أن المهدي لعب في الدرجة الأولى مع فريق لوغيون ولكن حتى هما رجعوه من بعد الإعارة، داك الشي علاش مشا لكليرمون في صفقة بالمجان.
أحسن مدافع
لمدة عامين بان بنعطية باللي ماشي ديال الدرجة الثانية، وباللي القدرات التقنية والجسدية ديالو فايتة هاد المستوى، هاد الشي اللي خلى نادي أودينيزي ياخذو و”مجانا”، لأنه انتهى العقد ديالو مع النادي الفرنسي، وسنا المهدي عقد ديال خمس سنوات، وفي العام الثاني بان “الكابيتانو” كواحد من أحسن المدافعين في الدوري الإيطالي، وكان ديما كيختاروه متابعي الدوري كأفضل مدافع، وهاد الشي خلى أندية كبيرة تبغي تشريه، ولكن المهدي ما بغاش يخلي اودينيزي فداك العام حيث الفريق كان عندو مشروع وما بغاش ينسى فضل هاد الفريق اللي خرجو للنجومية.
مدافع هداف
سنة 2013، أودينيزي دخل في أزمة واحتاج يبيع اللاعبين، وغادي يكون واحد منهم بنعطية اللي دوز ثلاثة مواسم. انتقل لنادي روما ب13 مليون أورو، وغادي يرجع مدافع هداف ولكن غادي يخرج بعد عام فقط، حيث نادي الذئاب ما وفاش بالوعود المادية اللي دار معاه.
من بايرن ميونيخ إلى يوفنتوس
ورب ضارة نافعة، المهدي بنعطية غادي يجيه عرض من واحد من عمالقة أوروبا اللي هو فريق بايرن ميونيخ الألماني، غدي يشريوه ب28 مليون يورو، وراتب سنوي ديال 6.5 مليون أورو بدون حوافز، وتما غادي يريح أول الألقاب في التاريخ ديالو، حيث فعامين ربح الدوري ألماني وكأس ألمانيا لمدة عامين، واخا العام الثاني دوزو إصابات وخسر بلاصتو ولكن جاه عرض إعارة لبطل إيطاليا يوفنتوس.
السيدة العجوز
سنة 2016، غادي يرجع المهدي للملاعب تألق فيها، اللي هي الأراضي الإيطالية، وغادي يلعب مع نادي يوفنتوس عام على سبيل الإعارة، ولكن بان المهدي في الواجهة حيث سجل أول هدف ديالو في الديربي ضد ميلان، وسجل هدف ضد العملاق الكتالوني برشلونة، الشي اللي خلى الصحافة الإيطالية تهضر عليه كمدافع صلب بحس تهديفي عالي وعندو موقع لحركات المهاجمين، وعليه يوفنتوس شرات بنعطية بصفة نهائية سنة 2017.
ولازال المهدي لحد الان مع السيدة العجوز، اللي ربح معاها زوج ألقاب الدوري الإيطالي وزوج كأس ايطاليا.
البداية مع الأسود
مع المنتخب بنعطية لعب أول مرة مع المغرب سنة 2008، ومن بعد رجع هو قائد المنتخب، وشارك فثلاث بطولات لكأس الأمم الإفريقية، وشارك ف54 مباراة دولية وسجل هدفين، وكان الحدث الأعظم هو التأهل إلى كأس العالم 2018.
أب لأربع أبناء
المهدي متزوج بسيدة فرنسية سميتها سيسيليا، لعبات دور كبير في الحياة ديالو المهنية، حيث خلاتو يركز على العمل ديالو بدون مشاكل، وهي قليلة الظهور الإعلامي، حيث مقابلة غير ولادها اللي عندو معاها وهما 4: لينا وقيس وعليا ونايل، حيث مراتو ولدات ليه فكل نادي ولد.
