محمد محلا
قضية “ضريب الغرزة” ما زال منوضة الصداع. هاد المرة اتصل موقع “كيفاش” بالعربي المحرشي، عضو فريق الأصالة والمعاصرة في مجلس المستشارين، اللي قال ليه فوزي بنعلال، رئيس الجلسة، “ضريب الغرزة”. المحرشي أوضح أنه “خياط وعندو محلات في الرباط وليس عيبا، ما دام هناك تمثيلية ديال الصناع التقليديين في المجلس، لكن جملة “ضريب الغرزة فيها ما فيها”.
مالك آ السي العربي هاد الأيام في مجلس المستشارين؟ كنت تقلقتي من شي حاجة طرات ليك؟
لا بالعكس، الأمور عادية، وحنا مولفين حيت كنديرو السياسة وفي السياسة لا بد ما كتلاقى مع المزيان ومع العيان، وكتلاقى اللي يطيرو ليك واللي يتجاوب معاك، شيء عادي طرحت موقف في مجلس المستشارين ورئيس الجلسة يمكن تقلق من الكلام ديالي، حيت طلبت منو يساويني مع بعض الإخوة اللي سبقوني في الإحاطة، وتكلمو 3 دقائق و30 ثانية، وهو جاوبني بألفاظ ماشي ديال إنسان مسؤول، ولكن للأسف هاد الشي كيوقع.
ولكن قال رئيس الجلسة أنت من دون الناس اللي ديما كتحتج على الوقت، واش بصح؟
لا ماشي ديما. فوزي بنعلال، رئيس الجلسة، كنعرفو جد المعرفة، وكيفما قال أنا كنت معاه في حزب الاستقلال، وكنا كنشتغلو بشكل واحد وفي انسجام، وفي وقت مشيت للأصالة والمعاصرة ملي تحدث وتبين ليا أنه مشروع حقيقي، انخرطت فيه وعملت فيه وعجبني المشروع ولقيت فيه ذاتي.
ودابا واش صافيا القلوب؟
حنا عادية عندنا الأمور كبرلمانيين.
كتديرو السياسة ومرة مرة كديرو شخصنة الصراع؟
لا ما كين شخصنة، بالنسبة لي طرحت سؤال على الرئيس، ما كيهمنيش آش من حزب هو ولا شكون هو، واش مزيان ولا عيان واش صالح ولا ما صلحش واش واعي ولا ما وعيش… ويلا طرات شي حاجة مثل ديك الألفاظ اللي تبعها الجميع هاديك مسؤولية مؤسسة مجلس المستشارين، خاصها تحمل مسؤوليتها، وتوعي وتأطر الناس اللي أعضاء في المكتب، اللي خاصهم يتحملو مسؤوليتهم، حيت هوما كيخاطبو الشعب المغربي وكيخاطبو ممثلي الأمة، ويتحمل مسؤولتو هو والرئيس، وأنا لا يهمني ما يقول فوزي، حيت أنا أتكلم مع الرئاسة، ويلا خرقت القانون ممكن يقطعني بلا ما يتجاوب معايا بلا ما يطعني بلا ما نصول بالأخذ والرد…
(مقاطعا) بلا ضريب الطر بلا ضريب الغرزة.
بلا ضريب الغرزة بلا ضريب الطر بلا حتى شي حاجة. راه حتى المسألة ديال ضريب الغرزة، واللي قال عليها فوزي باللي العربي المحرشي كان خياط، راه عادي، أنا مازال دابا عندي محلات ديال الخياطة والتجارة في الرباط وفي جهات أخرى، وعندنا تمثيلية ديال الصناع التقليديين، وديال التجار وديال الحدادة والخرازة، هاد الشي بقوة القانون، يعني ماشي شي حاجة جديدة ولا غريبة، غير هو الطريقة باش قالها فيها ما فيها، وكاين برلمانيين خياطة وعندنا رؤساء غرف خياطة ماشي عيب.
