بقلم: نجيكم نيشان
شي صحافيين تخالط ليهم شعبان مع رمضان في هاد البلوكاج والديبلوكاج مشاورات تشكيل الحكومة، غير جيب يا فم وقول.
بعد لقاء مستشاري الملك مع ابن كيران شي وحدين مشاو قالو باللي الأزمة غادي تكون عند الحلفاء المستقبليين ديال ابن كيران، حيت غادي يخافو ويتخلعو وغادي يمشيو يجريو عند رئيس الحكومة ويقولو ليه حنا مزاوكين ها العار دخلنا معاك قبل ما تسد لباب، ولكن اللي وقع هو العكس.
هاد الناس براسهم مشاو قالو باللي ابن كيران غادي يحط استقالتو وشي استقالة ما شفناها، بحال كيديرو لينا الرعب، ويلا مشا ابن كيران سنموت وسينتهي العالم.
بنادم مزيان يوزن الكلام عاد يحلل ويهلل وما يبقاش غير جيب يا فم وقول، كيف كندير أنا مثلا، غير باش يتسمى راه محلل وكيفهم.
