بقلم: نجيكم نيشان
الغرام والكلام المعسول والنوستالجيا وتاريخ الحب المشترك هو اللي طبع لقاء إدريس لشكر، الكاتب الأول ديال حزب الاتحاد الاشتراكي للقوات الشعبية، مع عبد الإله ابن كيران، رئيس الحكومة، البارح (الثلاثاء 18 أكتوبر)، في أول لقاء مشاورات بينهم.
بقاو حبني نحبك، حتى ابن كيران قال باللي واخا يجلس مع لشكر 15 ساعة ما يملش من الحتيت معاه.
هو الصراحة باعتباري محلل فحتى هاد الشي ديال الحب كنعتبر أن اللي وقع عادي جدا. واحد ومرتو تخاصمو، والقضية دخلو فيها العائلات دوروها سبان ومعيور، وشوية رجع الحنين والحب وتصالحو ومريضنا ما عندو باس. والعروسة للعريس والجري للمتاعيس.
علاه آش فيها كاع يلا قال لشكر يلا صوتو على الحزب المعلوم غادي نوليو بحال سوريا والعراق وليبيا وجزر الوقواق؟ ما فيها والو، المهم هو حب الوزارة، والله يرزق الصحة والسلامة.
واللي تعجب دابا يتبلا..
