بقلم: نجيكم نيشان
ها حنا وصلنا لمخاصمة الضرايرات اللي قلنا للسي ابن كيران هاد الأسبوع.
عزيز أخنوش مول الحمامة وحميد شباط مول الميزان ضاربو وما خلاو في بعضياتهم غير اللي نساو.
أخنوش قال لابن كيران ما بغيتش شباط في الحكومة، وابن كيران ناض قالها للصحافة وشباط ما عجبوش الحال وضرو خاطرو، ناض مول الميزان خرج مقال في الجريدة ديالو ما خلّى في أخنوش غير اللي نسا.
المهم مخاصمة الضرايرات كيف قلنا، ودابا بداوها بالمعيور وحشيان الهضرة في انتظار يضاربو ويتكامشو لابن كيران في عش الزوجية.
الحركة الشعبية حتى هي ضارها خاطرها وكتلعب العشرة على ابن كيران، حيت السي العنصر ما بغاش يخرج خاسر من هاد الزواج.
أما الزوجة الوفية، حزب الكتاب، فشادة تيقارها وكتقول ليهم نعلو الشيطان، وهي الوحيدة اللي ضامنها ابن كيران هاد الساعة.
السي لشكر هاد الساع داخل سوق راسو، ناض لبارح عرض عليه لعرس ولدو ول حزب الوردة كيبان بغا يبرد السوق ويصالح لخواطر. تبارك الله على نسيمة لحر.