محمد المبارك
الكروبات الفايس تختلف حسب المواضيع والاهتمامات، ولكن في بعض الحالات تختلف حسب الجنس، يعني كروبات للذكور وأخرى للإناث.
كروبات الذكور، في غالب الأحيان، كتكون غير على الرياضة والفضائح، و لكن كروبات لبنات كيهضرو تقريبا في جميع المواضيع والتفاعل كيكون كبير بزاف.
شنو هي أهم مواضيع هاد الكروبات؟ وشكون هما المؤسسين؟ وشنو هي أكبر التجمعات؟
أجمل نساء الكون…
نبداو بأشهر كروب نسائي في الفايس بوك “مغربيات أجمل نساء الكون”. هاد الكروب كان أقوى وأكبر تجمع للنساء المغربيات، كيحطو فيه مواضيع مختلفة ومتنوعة، من خلطات التجميل والعناية بالبشرة وتقديم النصائح، وحتى خطط الإيقاع بالرجال والعديد من المواضيع التي تخص النساء.
أشهر واقعة كانت وقعات هي فاش بداو كيحطو صور ديال دراري وكيديرو مخططات جهمنية للإيقاع بهم، وتما بدات حرب كبيرة بين هاد الكروب وبين كروبات ديال الدراري اللي بداو كيدخلو بـ”فوكونط” ويهجموا.
انتهى هاد الصراع بسقوط الكروب الأول اللي كان فيه كثر من 360 ألف فتاة مغربية من داخل و خارج البلاد، ومن مختلف الأعمار والطبقات الاجتماعية، ومن بعد دارو كروب جديد بنفس الاسم ولكن ما بقاش كيف الأول، وبقات غير مواضيع الملكياج والحكايات، من بعد ما كان كيدير حملات كبيرة ومساعدات للبنات المقبلات على الزواج وحتى اللي كيقلبو على شي طبيب من أجل الإجهاض أو ترميم غشاء البكارة.
كيد المغربيات…
الكروب الثاني هو “كيد المغربيات”، نفس السياق تقريبا غير هو كان أكثر تخصصا في ما يخص المرأة المغربية، الطبخ والملابس والأعراس، ولكن زايد شوية، حيث كيكونو فيه أغلب المنشورات قصص من الواقع، ما يسجد “كيد النساء”، يعني شي قالب دارتو بنت ولا امرة متزوجة لراجلها، ومن هنا جات تسمية “كيد المغربيات”.
هاد الكروب فيه تقريبا 120 ألف بنت، وبطبيعة الحال كاينين دراري داخلين بـ”فوكونط”.
ثورة أنثى…
كاينين كروبات أخرى اللي كيهضرو على مواضيع خاصة وأشهرهم “ثورة أنثى” اللي صاوباتو لبني أبيضار، وكان فيه ما يزيد على 30 ألف من مختلف الدول، والبنات فيه مختارين بعناية وبشروط واللي أهمها المستوى الثقافي. كانوا كيحطوا فيه مواضيع تخص حرية المرأة وحقوقها وكذلك الظلم اللي كتعيشو في مجتمعات ذكورية.
بقى هاد الكروب حتى جا النهار للي مرضات فيه، ودارو البنات اللي مكلفات خطأ بإدخال بعض الذكور بهدف الاستماع إلى رأيهم في يخص ذلك الموضوع، ولكن هاد الدراري فاش دخلو أغلبهم خذا الموضوع بسخرية وكتب واحد ليهم فالكروب: “هيا يا نساء الكون لنحطم عرش الذكور”، وكانت هذه هي نهاية هاد الكروب حيث لبنى حيداتو ودارت بلاصتو كروب جديد سماتو “الحنونات”، كروب صغير عددا ولكن جمعات أغلب البنات المؤثرات المغربيات وكيديرو لايفات بكثرة، حسب مواضيع وأدوار قسماتها عليهم لبنى.
الطبخ والشهيوات…
كاينين كروبات الطبخ والشهيوات وخلطات التجميل ومواد التجميل اللي حتى هما عندهم إقبال كبير في الفايس.
هاد لكروبات نفعوا شحال من بنت، ولكن كذلك ضروا شحال من واحدة بسبب غياب التقنين من قبل مسيري المجموعات والدراري اللي كيدخلو تما فوكونط كيبداو يفضحوا أسرار لبنات.