تحدث عزيز البدراوي، رئيس فريق الرجاء الرياضي، عن الأزمة المالية التي يمر منها الفريق الأخضر والتي حرمته من الانتدابات في الميركاتو الشتوي الجاري، مبرزا أن الشيء الوحيد الذي تبقى من اسم العالمي المعروف على الفريق هو الجمهور.
وأكد البدراوي، خلال حلوله يوم أمس الأحد (8 يناير)، ضيفا على برنامج “ريپلاي” على القناة الثانية، إن “الأزمة المالية را أزمة عند جل الفرق باستثناء فريقين أو 3، ولكن الرجا عندها أزمة شوية قاصحة حيت ورثناها من المكاتب السابقة، وهاد الشي ما كيعنيش أننا كنتملصو من المسؤولية لمواجهة هاد الواقع، الأزمة كنواجهها بلي عطى الله واللي عندنا وكنتمناو نلقاو ليها حل فأقرب وقت”.
وأضاف “اليوم كندبرو الوضع المالي داخل النادي بأكبر حكامة اللي ممكن تكون بطريقة معقلنة، وبداك الشي اللي عرفنا فعالم المال والأعمال باش نتجاوزو أزمة مالية، وفالرجا اليوم قدرنا أننا نخلصو اللعابة الأجور ديالهم، فالوقت اللي عندك كتلة ديال أجور كبيرة، وندبر المرحلة اللي سبقاتنا يعني متأخرات اللاعبين اللي بقات عند النادي سواء اللي غادرو ولا اللي باقين والمنح أيضا، وما كيبانش ليا كاين أكثر حكامة بأنك تسير حسن من هاد الطريقة هادي”.
وتابع البدرواي “أنا كنقول أنه غير بمداخيل الرجا ومداخيل جمهور الرجا اللي كيحضر ديما غنقدرو ندبرو الوضع”، مشددا على أن “الشيء الوحيد اللي ما زال عندنا من العالمية اللي معروفة على الرجاء العالمي هو الجمهور ديالها جمهور الكورفا سود اللي ما نذّكروش عليه”.
