عصام أيت علي
واحد المثل مغربي كيقول “كتطيح البقرة كيكثرو الجناوا”. الموضوع اللي شادين به الستون سكان فايس بوك من ليلة البارح الأربعاء (26 أكتوبر)، هو اعتقال سعد لمجرد في العاصمة الفرنسية باريس.
كل واحد وشنو كيقول بخصوص هاد القضية اللي قسمات البنات والأولاد. كيفاش؟
إحدى المعجبات بالفنان سعد لمجرد كتبت في تعليق على خبر إلقاء القبض على لمجرد: “هاديك الصورة ديال القبض على لمجرد ماشي صحيحة، حيت وقيلا لمجرد كيصور كليب تماك”، فيما قالت معجبة أخرى بـ”لمعلم”: “أودي سيد مسكين محسود، حيت وصل للعالمية، وبلاصت ما تساندوه، كتضربو فيه وتعيبو عليه”.
فايسبوكية أخرى كتبت: “بكثرة ما شفت بنادم اليوم كيكسل في سعد المجرد ، كنسول راسي فين هادوك اللي كانو كيطبلو ليه ويقولو سعد رافع راسنا وديك المواويل”.
خونا مرافق النجوم حتى هو تدخل فالموضوع، وقال بأن خبر اعتقال سعد لمجرد إشاعة.
وكاين النوع الآخر اللي اختار يكتب الشعر على حبيبهم لمجرد.
في المقابل، اعتبر أحد الفايسبوكيين في تعليق على الخبر: “الكبيدة خرجات على خونا لمجرد”. وتهكم آخر على لمجرد: “صيفطناك فرنسا دير شو تماك فالمسرح، درتيه فالأوطيل.. وراك ماشي ساهل”.
إحدى الصفحات في الفضاء الأزرق كتبت: “درتيها فمريكان وكذبتي الخبر وقلنا يمكن هي ضريبة النجاح، ولكن آ صاحبي اليوم الصورة ديالك ونتا مشدود صعيبة والقضية هي محاولة الاغتصاب.. سالينا سالينا”.
أحد المعلقين على الخبر قال: “لمجرد تزوج حسن ليك من هاد الشوهة”.
