محمد المبارك
كأس العالم تظاهرة عالمية، ومناسبة لأي واحد باش يسوق العمل ديالو، يلا لقى الطريقة والصياغة الصحيحة. والنموذج من كولومبيا، فنان اختيار جسد المرأة والمنتخبات باش يتشهر. كيفاش؟
قبل 20 يوم من كأس العالم، واحد الفنان كولومبي، سميتو جيوفاني زيترو، متخصص ف”التاتواج والصباغة على الجسد العاري”، طلق مشروع سميتو “أنخيليس اوربانوس”، جمع فيه 32 بنت صبغ ليهم فوق الجسد ديالهم ألوان أعلام الدول المشاركة في المونديال، وبدا تيحط صور “موديلات” على حساب المجموعات والمباريات اللي غادي يتلعبو.
وفي الأيام الأخيرة، هاد الصور نتشرات على نطاق واسع في مواقع التواصل الاجتماعي، وانطلقت إشاعة أن هاد الشي رسمي وباللي الفيفا اختارت بنات من كل دولة، بانو بهاد الطريقة، اللي تعتبر مخلة في بعض الدول العربية المشاركة.
وحسب ما تناقلته وسائل الإعلام الكولومبية، فإن ما قام به جيوفاني اجتهاد شخصي منه ولا علاقة له بالفيفا، وحتى البنات اللي خدمو معاه من كولومبيا وأغلبهم من مدينة بوكوتا الكولومبية، وتلاقاهم عن طريق مواقع التواصل الاجتماعي، حيث كان كل مرة كيدير عرض وكتجي بنت قريبة للمواصفات ديال الدولة اللي بغا يرسم الموديل ديالها.
