العارضة ابتسام المومني ما كفاهاش الحالة اللي دارت على البساط الأحمر فمهرجان الفيلم ديال مراكش، واللي بقات كتتصور فيه كل نهار واخا هو مخصص للممثلين والنجوم الكبار، وهي ما عندها علاقة بالتمثيل ولا هي نجمة كبيرة.
ابتسام بدات كتكلاشي فالناس اللي كبر منها سنا وفنا ونجومية، وكانت أول ضحايا هاد العارضة المزعومة الممثلة الكبيرة نعيمة إلياس.
سبب هاد النزاع، هو فاش سوّلوا الفنانة نعيمة إلياس علاش ما كتجيش للمهرجان الدولي للفيلم في مراكش، وقالت ليهم أنها ما عمرها تلقات الدعوة، وباللي عوضو النجوم بأشباه النجوم، وقالت باللي منهم وحدة “ما كتعرف حتى تدوي”.
ومن بين جميع “المتطفلات” اللي دازو هاد العام على البساط الأحمر، واللي كان العدد ديالهم كبير، حتى وحدة ما حسات براسها هي اللي مقصودة إلا العارضة ابتسام المومني، واللي بدات كتعاير الفنانة المغربية نعيمة إلياس بأبشع النعوت، وقالت ليها باللي هي شرفات وخاصها تعطي الفرصة للشباب، وباللي نعيمة إلياس جاتها الغيرة من ابتسام المومني.
مجموعة من رواد مواقع التواصل الاجتماعي ما عجبهمش كلام ابتسام المومني، فقالت إحدى المعلقات على يوتيوب: “هاد الشي مازال كاع ما بديتي وعطايها للمعيار، نعيمة إلياس راه عندها تاريخ فني كبير، وأنت بقاي تعطي لراسك ألقاب مخترعة”. وعلق آخر: “نعيمة إلياس مدرسة وفنانة كبيرة، ولكن انت شكون؟؟ ما عندك حتى عمل فني يخلينا نعرفوك”.
