محمد المبارك
يوسف النصيري واحد من الأسود اللي خلاو البصمة ديالهم في كأس العالم 2018 في روسيا، من بعد ما سجل هدف تاريخي غادي يبقى الذاكرة ديال المغاربة.
الطفولة.. اللعب في الأحياء
ولد يوسف سنة 1997 ففاس، فحي فأحد الأحياء الشعبية العاشقة لكرة القدم، واللي هو حي بلخياط في مقاطعة المرينيين، وتما كان كيلعب مع أبناء الحي ديالو على ملعب “الشعبة”، واللي معروف عند ناس فاس.
المغرب الفاسي
فاش كانت عندو 9 سنين شافو واحد من مدربي فرق الأحياء في فاس وعرفو باللي موهبة قادمة في كرة القدم، ودخلو لفريق الحي “الشروق الرياضي الفاسي”، ومن بعد مدة قصيرة ومع الطول ديالو والموهبة شافوه المؤطرين ديالو المغرب الفاسي وخداوه يتدرب معاهم في فئة الصغار.
من أكاديمية محمد السادس إلى ملقا
في سنة 2011 غادي يدخل لأكاديمية محمد السادس لكرة القدم، وغادي يدوز فيها 4 سنين، وهنا غادي يشوفوه كشافي المواهب ديال نادي ملقا الإسباني وغادي يأخذوه ب125 ألف يورو وغادي يلعب مع الفريق الرديف ديالهم في الدرجة الثالثة الإسبانية.
وغادي يسجل 6 أهداف حاسمة في 6 مباريات، وغادي يرجع واحد من نجوم الدرجة الثالثة، وهنا مدرب الفريق الأول غادي يختارو يلعب معاهم وغادي يوقع أول عقد احترافي طويل الأمد لمدة أربع سنوات.
المشاركة مع الأسود
بالنسبة للمشاركة ديالو مع المنتخب، فيوسف لعب في العديد من الفئات العمرية للمنتخب المغربي أقل من 20 سنة، ولعب سبعة مقابلات سجل فيها 3 أهداف، أما بالنسبة للمنتخب الكبير فشارك في 17 مباراة.
رجل المهام الصعبة
من أجمل القصص في المسيرة ديال الناصيري أنه دائما محط جدل، حيث فكأس إفريقيا 2017 كان عليه القليل من الجدل ومع دخوله ضد الطوغو سجل الهدف الثالث، ولكن ما كانتش عندو أهمية كبيرة حيث المغرب كان رابح بهدفين مقابل لا شيء.
وفاش جات بطولة كأس العالم المدرب الفرنسي هيرفي رونارد عاود دار فيه الثقة ديالو، وخداه في القائمة على حساب بدر بانون في قرار مثير للجدل، والناصيري ما خيبش الظن ديال هيرفي وسجل هدف عالمي بكل المقاييس قدام دفاع إسبانيا، وارتقاء ضد سيرخيو راموس، في شباك واحد من أحسن الحراس في العالم، دافيد دي هيا.
