قصص الحب الرومانسية اللي كاينة في القصص والأفلام، بعض الشباب كيعيشها، وكيرجعها واقع، وحيث الظروف والبيئة كتلعب دور كبير، كل واحد كيف كيعيش هاد الحب.
في قرية فنواحي مدينة الصويرة شاب عشريني حاول شحال من مرة يتزوج بواحد لبنت، ولكن الأب ديالها رافض بحجة أن بنتو ما زال صغيرة على الزواج وخاصها تقرا، وهاد الشي ما منعش العاشق الولهان أنه يبقى تابع هاد البنت وحاضيها.
ومع بداية الموسم الدراسي هاد العام، هاد الشاب شاف باللي البنت اللي كيبغيها كتوقف تسنى طوبيس تحت أشعة الشمس، وبكثرة الخوف ديالو عليها، مشى شرا نقلة صغيرة من شجر البزارة، وغرسها في البلاصة فين كيتسناو الطوبيس، وبقى كيسقيها ويتهلا فيها.
بعد ثمانية شهور، الشجرة كبرات ولكن ما زال ما وصلات لطول يعطي الظل ويسفتدوا منو الناس، فقرر الشاب يدير الباش حداها في انتظار “شجرة الحب” تكبر وتعطي الظل.