محمد المبارك
المغاربة هاد العام غادي يتهناو من صداع القهاوي، والفرجة غادي تكون عائلية من داخل البيوت ديالهم، ويشوفو جميع مباريات المنتخب وحتى مباريات أخرى من الأكثر أهمية فمونديال روسيا. كيفاش؟
الشركة الوطنية للإذاعة والتلفزيون شدات حقوق البث ديال 22 مباراة ديال كأس العالم 2018 من “بي إن سبورت”، واللي البث ديالها غادي يكون أرضي يتفرجو فيه المغاربة بلا ديكودور.
البث غادي يبدا اليوم الخميس (14 يونيو) مع الساعة الثالثة بعد الزوال، وغادي تنقل المباراة الافتتاحية بين روسيا والسعودية، والمباراة الثانية غادي تكون مباراة المغرب وإيران غدا الجمعة (15 يوينو) في الساعة الثالثة بعد الزوال.
وبالنسبة ل20 ماتش اللي بقاو غتدي تحط قائمة من بعد ديالهم كاملين، وبكل تأكيد مباريات المنتخب كاينين منهم.
ومن جهة أخرى، غادي يتحطو فيديوهات قصيرة للمباريات كاملين على القناة الرسمية لقناة الرياضية على يوتيوب وصفحاتها على مواقع التواصل الاجتماعي.