“حمد الله أفضل هداف في العالم” “حمد الله ثالث أفضل هداف في العالم”، وألقاب كثيرة كتعطى للدولي المغربي اللي كيلعب مع النصر السعودي، وكتتزاد الهضرة عليهم فاش كيكون لاعب د المنتخب الوطني.
حمد الله العام اللي فات وصل واحد الرقم كبير ديال الأهداف فالدوري السعودي، وسجل 34 هدف وخدا “الهداف التاريخي” ديال الدوري السعودي، وبعض المواقع اللي ماشي رسمية، حطاتو فالتصنيف ديال أفضل الهدافين فالعالم، ومنها اللي حطاتو بالأرقام أو التنقيط خاص ديالها، وهاد الشي اللي خلاه عند بعض الناس يدخل فقائمة الهدافين العالميين.
وعلى سبيل المثال، موقع “كلوب وورد رانكينغ” حاط حمد الله حاليا هو ثاني أفضل هداف فالعالم ب45 هدف من بعد الأرجنتيني ليونيل ميسي اللي سجل 48 هدف، وفنفس التصنيف حاط الفرنسي كريم بنزيما فالمركز الثامن ب26 هدف، والبرتغالي كريستانو رونالدو التاسع ب28 هدف، وحاط المصري عمر سومة اللي كيلعب فالأهلي السعودي فالمركز 18 ب27 هدف، وحاط الفرنسي كليان مبامي هداف باريس سان جيرمان فالمركز 21 ب32 هدف.
التصنيف كيبان غير منطقى، ولكن هاد الشي راجع لكون الموقع داير واحد النظام ديال التنقيط، اللي حسب البطولات كيعطي تنقيط على كل هدف، فمثلا هدف ميسي ضد ريال مدريد فالدوري الإسباني كيساوي 9 ديال النقط، وهدف حمد الله فنصف كأس السعودية ضد الاتحاد كيساوي 12 النقطة، وهكذا حتى كتجمع النقط.
ومثلا موقع “ترونسفير ماركت” اللي مختص فالأرقام فقط، عطى لحمد الله فشهر أبريل اللي فات الهداف الأول في العالم سنة 2019، على حسب عدد الأهداف اللي سجل، وكان فالمركز الثاني الإسباني أليخاندور غونزاليس اللي كيلعب في الدرجة الثانية في إسبانيا!
هاد التصنيف غير معتمد من الاتحاد الدولي لكرة القدم “الفيفا”، ولا من أي جهة رسمية في كرة القدم، حيث لا يحترم معايير التنافسية وباللي كل بطولة عندها خصائص ديالها، وهاد الشي كيبقى تنصيف ديال مواقع فقط، اللي ما عندها حتى تأثير إلا بالنسبة للناس اللي باغية تدير إحصائيات أو تعرف أرقام اللاعبين.
التنصيف اللي كاين فبحال هاد الشي، هي جائزة الحذاء الذهبي اللي كيعطيها الاتحاد الأوروبي، بالنسبة للهدافين ديال الدوريات الأوروبية فقط، وعندها معايير خاصة، فمثلا هدف فإسبانيا أو إنجلترا أو إيطاليا أو ألمانيا أو فرنسا كيتحسب بجوج نقط، باعتبارهم الدوريات الخمسة القوية، وأما الدوريات المتوسطة بحال البرتغال أو هولندا أو بلجيكا كيتحسب الهدف ب1.5 نقطة، وأما الدوريات الصغيرة بحال النرويج أو السويد كيتحسب الهدف بنقطة واحدة.
يعني باش يمكن يدخل حمد الله فهاد التصنيف ويكون لقب ديال الهداف العالمي، خاص يكون تقييم للدوري السعودي من المختصين وشحال غادي يكون معامل هاد الهدف باش المقارنة تكون فمحلها، وإلا كيبقى هاد لقب “أفضل هداف في العالم” غير كلام ما عندو أساس، كتلعب بيه المواقع الإخبارية لا غير!
