هادشي ديال الرقية الشرعية غادي وكيتزاد فالمغرب، وكل مرة كتخرج شي حاجة جديدة، كتنسينا داك الشي اللي فات، هاد السيمانة فيديو جديد ديال واحد الراقي سماوه رواد السوشل ميديا “جاكي شان”، حيت الفيديو ديالو كيبان فيه كيدير حركات ديال الكراطي بحال الممثل الصيني المعروف، هاد اللقطات ضحكو بزاف ديال الناس، وكاين اللي بقى فيه الحال من مستوى الجهل اللي وصلو هادو اللي كيمشو عند بحال هاد “الرقاة”.
مول الفيديو كيسمي راسو الراقي والمعالج الروحاني عبد الله السوسي، وكيقول باللي الأصل ديالو من سوس، وعندو البركة اللي كتحيد السحر والشياطين، وداير قناة فاليوتيوب كيتابعو فيها أكثر من 78 ألف واحد، وكينشر فيها فيديوهات ديال داك الشي ديال “العلاج” اللي كيدير فالمركز ديالو اللي كاين فالرباط.
الراقي “جاكي شان” ماشي بحال الرقاة لاخرين، هو خدام غير بسورة الفاتحة وآية الكرسي وقصار السور، وبزاف ديال الهضرة، وكيداعي باللي بالبركة ديالو الجن كيخاف منو، وكيبقى يهضر معاه، وبعد المرات ما كتكفيش الهضرة، وكيدوز للكراطي والتايكواندو، بحال الفيديو اللي دار السيمانة اللي فاتت وتشهر على مواقع التواصل الاجتماعي.
https://m.facebook.com/story.php?story_fbid=2982625321764007&id=229475587079008
عبد الله السوسي أو الراقي “جاكي شان”، حسب مصادر ديال موقع “كيفاش”، كان من قبل كيخدم فالنقل بالطوموبيل ديالو، وقبل عامين تقريبا، بدا فهاد الشي ديال العلاج الروحاني والرقية الشرعية وخدم فيه مزيان، ورجع كيسافر خارج المغرب باش يعالج الناس “بهاد البركة” اللي كيقول.
والراقي “جاكي شان” داير 3 ديال التلفونات وما مساليش يجاوب وكيخلي غير الناس اللي خدامة عندو يجاوبو، حيت كيزورو شي 300 واحد فنهار، وداير داك الشي بالتوقيت كيبدا مع 10 ديال الصباح، وخاص ضروري يكون عند اللي جاي عندو موعد باش يدخل!.