محمد المبارك
فوزي لقجع دار نقلة في كرة القدم في ظرف 5 سنوات اللي شغل فيهامنصب رئيس الجامعة الملكية لكرة القدم.
فوزي لقجع من مواليد سنة 1970 في مدينة بركان، الأم ديالو ربة بيت والأب ديالو أستاذ والآن مفتش متقاعد، شد البكالوريا في شعبة العلوم التجريبية سنة 1988، وكان حاير واش يدير الطب، ولكن في الأخير دار بحال ولد عمو ودخل لمعهد الحسن الثاني للزراعة والبيطرة، اللي تخرج منو مهندس زراعي.
من بعد دخل للمدرسة الوطنية للإدارة وكان من الأوائل، الشي اللي خلاه يدخل للمفتشية العامة للمالية سنة 1996، ثم في سنة 2000 رجع رئيس لشعبة المجالات الإدارية.
وفي 2003، فوزي لقجع غادي يدخل لتقسيم الزراعة والمقاصة، وغادي يدوز فيها سبع سنوات ثم يولي مدير ميزانية الدولة التابعة لوزارة المالية.
سنة 2009، كانت بداية لقجع في عالم كرة القدم، فاش شد رئاسة نادي نهضة بركان لكرة القدم، واللي لعب فيه فاش كان صغير مع الناشئين، وطلع الفريق ديالو من قسم الهواة إلى قسم الأضواء، وتما غادي تبان القوة ديال لقجع كمسير رياضي، شيء اللي خلاه يدخل لسباق رئاسة الجامعة الملكية لكرة القدم، اللي فاز بها سنة 2013.
من بعد فاش لقجع ولى مسؤول على الكرة فالمغرب، تم تحقيق العديد من النجاحات، وعلى مستوى البنية التحتية استفد 62 فريق من هواة من “تعشيب” الأرضية ديالها، وتم إصلاح العديد من الملاعب ودار ليهم العشب الطبيعي والإنارة، وتم إنشاء 4 مراكز جهوية ومراكز تكوين، ورفع المنح للأندية في جميع الدرجات، وتشييد مركب دولي فتطوان، وتجديد المركب الدولي فالعيون.
أما على صعيد الانجازات الرياضية، فمع لقجع اللي جاب السياسة المالية، وباش ما خدمتي تزيد تخلص، فاز المنتخب المحلي بكأس إفريقيا للمحليين وتأهل المنتخب إلى نهائيات كأس العالم 2018، من بعد ما خلى رونارد خدام ووفر ليه جميع الآليات باش يكوّن منتخب قوي.
