أمن سطات شدو عصابة معتمدة على زوج بنات وحدة فيهم قاصر، باش كيسرقو أي دار شمو فيها ريحة الذهب ولا الفلوس، وفي هاد الفترة من السنة، الكونجيات كثار، والناس صبحو هوما اللي كيعرضو ديورهم للشفرة، ملي كيعلنو في مواقع التواصل الاجتماعي باللي غادي يخويو الدار ويسافرو، خصوصا صحاب لفلوس، حضيو روسكم راه حاضينكم الشفارة!
آش واقع؟
المصلحة الولائية للشرطة القضائية التابعة لولاية أمن سطات، شدّات البارح السبت (16 يوليوز)، خمسة أشخاص من بينهم 2 بنات، إحداهما قاصر، كتراوح أعمارهم ما بين 17 و 23 سنة، بشبهة تكوين عصابة إجرامية متخصصة في السرقات الموصوفة.
كيفاش وعلاش؟
المعلومات الأولية للبحث بينت باللي المشتبه فيهم كيستهدفو المنازل، وكيخونو خصوصا الحلي والمجوهرات وهواتف نقالة، وحتى مبالغ مالية مهمة، وعاونات الأبحاث والتحريات في تشخيص هوية المشتبه فيهم وتوقيفهم.
محجوزات نسائية
وحيتاش العصابة فيها لبنات، طبيعي يكون من بين المحجوزات، متحصلات سرقة نسائية، عملية التفتيش مكنت من حجز المجوهرات من المعدن الأصفر، وحقائب نسائية و17 تلفون محمول، فضلا عن أسلحة بيضاء يشتبه في استعمالها في ارتكاب هذه الأفعال الإجرامية.
القاصر تم الاحتفاظ بها تحت تدبير المراقبة، فيما تم إيداع الموقوفين الراشدين تحت تدبير الحراسة النظرية رهن إشارة البحث الذي تشرف عليه النيابة العامة المختصة، وذلك للكشف عن جميع الأفعال الإجرامية المنسوبة إليهم، فيما لا زالت التحريات جارية بغرض توقيف باقي المتورطين في ارتكاب هذه الأفعال الإجرامية.
