في نص ليلة الاثنين (22 غشت)، واحد الشاب ما قال ليه راسو غير يسرق علامة “قف” من حدا البحر في مدينة سلا، اللي عاد تحطات جديدة، وحطها فوق البيكالة ديالو وغادي بها لوجهة غير معروفة. حسب ما كيبان في صورة انتشرت على مواقع التواصل الاجتماعي.
من زهرو واحد السيد غادي فالطريق حتى كيبان ليه هادشي، كيعاود هاد السيد لموقع “كيفاش” أن صورو وأرسلها لصفحة ديال الفايس بوك محلية مختصة بالشأن ديال سلا، باش الناس تعرف شنو كيوقع، لهاد الممتلكات العمومية، اللي بزاف منها رجع كيبات ما يصبح.
وماشي غير هادشي، السيد ماشي من العاگزين، فأول باراج قدامو، علم البوليس وقال ليهم شنو كاين، وبعد دقائق قليلة، تم توقيف ديالو وطلعوه لسطافيط هو والبلاكة اللي سارق.
من جهة أخرى، أكد مصدر محلي لموقع “كيفاش” باللي هاد النوع ديال السرقات رجع كثير في مدينة سلا، بحيث كيدو هاد البلاكات وحتى طاروات الزبل لسوق المتلاشيات في كتباع تما لشي محلات، واللي حتى هما كيشدو ديك السلعة ويعاودو يقادو بيها حاجات أخرى.