من بعد عبارة “راك غادي فالخسران” ديال نور الدين بكر، دابا جات عبارة “ايا توتة ويا فرتوتة”، واللي انتشرت فالأيام الأخيرة على الفايس بوك، ودارو بيها رواد مواقع التواصل الاجتماعي ترولاتات كثيرة.
قصة هاد العبارة كترجع ليوم 10 نونبر الجاري، فاش شاب، سميتو (ياسر.ل) من مواليد الدار البيضاء، نشر مقطع فيديو في مجموعة فايسبوكية وهو داير مرهم على الوجه ديالو وكيقول: “والله يلا بوكوص زوين، يا فرتوتة ويا حوتة يا مول زيتونة ويا خونا”.
بهاد العبارات البسيطة، واللي هي مزيج من أغنية شعبية وضحك ديال دراري، ياسر رجع حديث مواقع التواصل الاجتماعي، وخرجوا من الفيديو ديالو ترولاتات كثيرة.
وفي حديث مع موقع “كيفاش”، قال ياسر، ابن مدينة الدار البيضاء، باللي هو دائما كيدير فيديوهات على سنابشات ساخرة بحال هاكا، وهاد الفيديو حطو فالفايس وانتشر.
