طارق باشلام
البيضاويون ماشي ساهلين، فينما كيوَحلُو يمشيو لشي بلاصة بالطوبيس، كيرسلو شكاية لشركة الحافلات باش تزيد الخطوط ديالها، “ما ضاع حق من ورائه مُطالب”.
وحتى الشركة من جهتها ما كاتخسّرش ليهم الخاطر، كاتزيدهوم الطوبيسات واللي كيضربو مسافات طوال، راه الكازاويين صحاب الطوبيس تّْزادو، كاين فيهم اللي حطّ الطوموبيل ولا الموطور حيت ليصانص والمازوط غاليين بزاف اللهم فـ 5 دراهم ولا 6.
شنو وقع؟
مع الصيف قرّب، كيكثر الطلّب على الخطوط ديال الطوبيس اللي كتمشي للبحر، وصولا لشواطئ بحال عين الذئاب، وهادشي علاش، شركة حافلات البيضاء دارت خدمتها، وزادت خط جديد استجابة للطلب القوي من الزبناء.
كيفاش وعلاش؟
اللي وقع، حسب مصدر من من الشركة لموقع “كيفاش”، أن شركة حافلات البيضاء، أعلنت عن إطلاق خط جديد غادي يبدأ انطلاقا من الوم الثلاثاء (5 يوليوز).
وحسب المصدر غادي يقطع الخط الجديد “L005، مسافة تفوق 17 كيلومتر، وغادي يتوقف في أكثر من 20 محطة ذهابا وإيابا.
من جانب آخر، غادي يربط الخط الجديد ما بين محطة القطار الدار البيضاء الميناء ومنطقة الألفة، مرورا بكل من مارينا الدار البيضاء ومسجد الحسن الثاني وشاطئ عن الذئاب، وسيدي عبد الرحمان وأيضا رياض الألفة. وهو خط مهم بزاف ومحوري بالنسبة لسكان كازا، وسيلة قاضية الغرض وبثمن مناسب، في انتظار ينقص ثمن ليصانص والمازوط وتسالا الأزمة، وترجع المياه لمجاريها.
