كلشي كان زوين ومقاد في المباراة الاستعراضية اليوم الثلاثاء (6 نونبر) في مدينة العيون، لإحياء ذكرى المسيرة الخضراء، ولكن الفنانة سلمى رشيد ريبات الحفلة، وكانت الحلقة الأضعف فهاد المناسبة الوطنية. كيفاش؟
الفنانة سلمى رشيد غنات النشيد الوطني على أرضية ملعب “محمد الشيخ الأغضف”، ولكن أخفقت صوتا وصورة، بداية من الحوايج اللي كانت لابسة واللي صالحين للقاء عاطفي فالمقهى وماشي ليوم وطني، وكذلك الأداء الكارثي والتبهديلة اللي دارت للنشيد واللي ما حافظاهش ودارت فيه خطأ كارثي، ملي غنات “إخوتي ها هيا” عوض “إخوتي هيا”.
المعلقين على مواقع التواصل الاجتماعي ما خلاوش هاد اللقطات تدوز مرور الكرام، فكتب أحدهم: “واش سلمى رشيد ما فراسهاش راها غادي تبان فجميع القنوات اللي لابسة هاد اللباس”.
وكتب آخر ساخرا: “الحمد لله علي الصقلي مات قبل ما يسمع إخوتي ها هي، كون راه يتعذب فقبرو دابا”.
