في منطقة أولاد عياد، إقليم الفقيه بن صالح، وقعت حادثة ما كناش مولفين نسمعو بحالها في المغرب إلا نادرا، تجمع فيها الاختطاف والاغتصاب والتعذيب على طريقة الأفلام.
استدراج واختطاف
خديجة فتاة قاصر عندها 17 سنة، واحد من ذوي السوابق كان دائما كيوقف ليها قدام المدرسة، وكيديها معه بالقوة. وهادي شهرين قرر يديها لبراكة في منطقة أولاد عياد، هو ومجموعة ديال الأصدقاء ديالو، واللي تناوبوا عليها في ممارسة الجنس، وشتى أنواع التعذيب، كيطفيو فيها السجائر ديالهم، وكيرسمو فيها أوشام، في جميع مناطق الجسد ديالها.
عائلة الفتاة وطلب المساعدة
عائلة خديجة فاش عرفوا باللي البنت ديالهم محتجزة من طرف العصابة تحركات، وحاول الأب ديالها يمشي يجيبها ولكن وقفوه المحتجزين ديالها، وما خلاوهش يديها، ومن الخوف ديالهم يدفع شكاية ضدهم طلقوها تمشي فحالها، ومن بعد العودة ديالها اكتشفت الأم حقيقة شنو وقع لابنتها مدة تفوق شهرين. قررت تدفع الشكاية ضد هؤلاء المجرمين واللي فضوا بكارة خديجة وتفننوا في تعذيبها.
إلقاء القبض على المغتصبين
خديجة أخبرت المحققين بأن أكثر من 14 شخصا احتجزوها وتناوبوا على اغتصابها، وأن كل واحد فيهم كان كيحرقها بالسجارة باش يخلي علامة، حسب الشهادة ديالها.
السلطات، إلى حدود أمس الاثنين (20 غشت)، ألقت القبض على 10 أشخاص، من بينهم رئيس العصابة، واللي غادي يتابعو بالعديد من التهم، منها الاغتصاب، والاحتجاز، والتعذيب، وتكوين عصابة إجرامية، ليتم بذلك إيداعهم بالسجن المحلي لبني ملال.
