اللي كنسعمو بزاف هو أن المشاهير كتكون صعيبة عليهم يبقاو مستمرين في علاقة ديال الزواج، وكاينين مشاهير اللي تزوجوا شحال ديال المرات، ووصلات حتال 7 المرات.
ولكن من جهة أخرى كاينين فنانة ومشاهير مغاربة اللي قدروا يحافظوا على العلاقة لسنوات طويلة.
فاطمة خير وسعد تسولي
هاد الثنائي كيشارك العديد من الصور ديالو على مواقع التواصل الاجتماعي، وبالخصوص في الأماكن الرومانسية.
الممثلة المغربية فاطمة خير وزوجها الممثل المغربي سعد تسولي عندهم علاقة ديال 17 سنة، بدات سنة 2001 فاش تلاقاو في عمل مسرحي اللي جمعهم بزوج، ومن بعد شهور قليلة تم الزواج بيناتهم، ودخلوا لقلوب الناس بحكم العلاقة القوية اللي جمعاتهم.
عزيز سعد الله وخديجة أسد
هذا هو أشهر وأقدم كوبل على الساحة الفنية المغربية، حيث العلاقة ديالهم بدات في أواخر السبعينيات، وجمعات بيناتهم خشبة المسرح.
وبقى هاد الكوبل مجمتع في الواقع وحتى على الشاشة، وكان أشهر ظهور ليهم في سلسة “لالة فاطمة” واللي لعبوا فيها دور البطولة كزوجين.
ورغم أنهم من الوسط الفني، إلا أن هاد الكوبل جد متحفظ في الحياة الخاصة ديالو وما كيهضروش عليها في وسائل الإعلام.
البشير عبدو ونزهة الركراكي
جوج فنانة وعطاو فنان آخر، المطرب البشير عبدو والفنانة نزهة الركراكي دوزو أزيد من 35 سنة في القفص الذهبي.
هاد العلاقة بدات في تونس فملتقى فني سنة 1982، ومن بعد مدة قصيرة تم الزواج، وبدات قصة واحد من أشهر العلاقات الزوجية.
رشيد الوالي وابتسام الوالي
رشيد الوالي واحد من الفنانين اللي اختار يتزوج من خارج الساحة الفنية، ومع ذلك قدرات العلاقة تنجح بيناتهم وتدوم أزيد من 22 سنة.
ومؤخرا تعرضات ابتسام الوالي لعدة انتقادات بسبب الشكل ديالها، ولكن ردات بطريقة راقية على المنتقدين واللي كتبين شخصيتها القوية.
