هاد السوشيل ميديا فالمغرب رجعات بحال شي جيب ديال كلون فالسيرك، كل مرة مخرجة مفاجأة جديدة، ومع الرقية الشرعية رجعات “مهنة من لا مهنة له”، واحد خو شي راقي قديم، بان ليه ف”حرفة خوك لايغلبوك”، وحتى هو قلبها رقية شرعية.
محمد لعلك أو الراقي سلطان كيف مسمي راسو، أو الراقي مول العاود كيف سماوه صحاب الفايس بوك، وحتى الراقي المشرمل اللي قالها مؤخرا على راسو، كلهم ألقاب ديال آخر ما خرجات الرقية الشرعية للساحة، شاب ثلاثيني كيهضر بحال مصطفى الصديق المعروف ب”إكش وان إكن وان” وكيقول حتى هو كيدير الرقية الشرعية.
عندو صفحة على الفايس بوك فيها كثر من 60 ألف متابع، وكيدير فيها فيديوهات مباشرة، ما كيقرا حتى سورة مقادة، وكيبقى يسب بكلام زنقاوي على أساس أنه كيهضر مع الجن، وكيحط فوق الفيديوهات شي عنوانين خرافية بحال “سلطان مع الحراس والآنسة ماريسا من الجان وبارطاجي يا إنسان” و”سلطان يعلم الجن طريقة النطق على اللسان والبداية أجب بنعم أو لا لتكسب معنا تفرشيخة من النوع الرفيع”.
هاد الشي من بعد ما كان تجارة ربحية، جات دابا هاد الموجة ديال الضحك، هاد الراقي السلطان وحسب ما كيقول فالفيديوهات ديالو، كيدير حصص تقدر توصل حتال 300 درهم لكل واحد، وهاد الفلوس اللي كتعطى للراقي سلطان والرقاة لآخرين ما كتخسرهاش الناس عند الأطباء النفسيين اللي قراو سنوات باش يعالجو المرضى، وهاد الرقاة حتى هما اللي ما كيخلصو لا ضريبة لا حتى حاجة، وزايدينها كيضحكو على واحد الفئة من الشعب، اللي الوعي ديالهم محدود، واللي جا يضحك عليهم، فصورة واضحة لاستغلال جهل الناس والمآسي ديالهم.