الثومة والفوطة وقيام الليل والماصاج والدعارة والضواصا ديال بوركابي.. طرائف كروبات المغربيات في 2017!

محمد المبارك

إلى جانب الأحداث الكبرى، العيالات المغربيات فالفايس بوك عايشين فالعالم الخاص ديالهم.

الفوطة سخونة كتنفخ الشفايف..

الفوطة سخونة اللي كتنفخ الشفايف كان من أكثر الأحدات اللي شغلات كروبات البنات. البلان خرج من “كيد المغربيات” وشوّط شفايف بزاف ديال البنات على الفايس.

الثومة كتجيب الخطاب..

دائما مع “كيد المغربيات” وبلان التومة اللي قالوا كتجيب الخطاب، والطريقة هي “حكها” تحت السباط أو في العتبة ديال الدار وتقول البنت “ثومة يا ثومة، جيبي ليا خطاب من كل حومة”.

حرب الجمال..

“المافيا المغربية”، كروب الحروب والمشاكل، من بعد ما ربحات المغربية شيرين حسني لقلب ملكة جمال العرب، على حساب الجزائرية، دخل في صراع مع الجزائريات. حرب دامت لأسابيع.
وحدة دات اللقب، والبنات مضاربات في الفايس بوك.

معنا بنت وزير..

فكروب “الجمال المغربي” وحدة كتبات منشور كتقول فيه باللي معهم بنت “وزير” متخفية باسم مستعار، وبداو البنات كيطلبو ويقولو عافاك قولي ليها تقول لباباها ينقص الزيت ويقلب لينا على الخدمة، العديد من المطالب، واللي انتهت بخروج الفتاة من الكروب بدون اعتراف.

هولندية كتصبن الزرابي..

كروب “الجمال المغربي” وقصة أثارت سخرية لمدة طويلة. ابنة أحد أثرياء الريف عايشة في هولندا وجات مع صديقها للمغرب بسبب مناسبة عائلية. وفاش حصلاتها الأم ديالو قال ليها باللي هادي خدامة جابها تصبن الزرابي.
البنت صبنات 20 زربية وعطاوها 200 درهم.

الكيكة المجنونة..

بنت صاوبات “كيكة” بدون بيض ومقادير سهلة جدا والبنات فكاع الكروبات حاولوا يقادوها وما طلعاتش، بل كانت النتائج كارثية وتسمات “الكيكة المجنونة”.

ضوصي بوركابي..

البنات دارو كروب سماوه “ضوسي بوركابي”، وكل واحدة كتحط صورة رجلها ولا خطيبها ولا حبيبها وكتسول لبنات شنو كيعرفوا عليه.
النتائج كانت رجل متزوج زوج عيالات وبالتخبية، وواحد خاطب فرقة ديال البنات في آن واحد.
في النهاية دارو دراري كروب بنفس الطريقة فتم إغلاق لكروبات بزوج حيث البنات خافوا على راسهم.

سارة المغربية..

صفحة للدعارة دارتها واحد البنت تحت اسم “سارة المغربية”، ومن بعد ما كشفها موقع “كيفاش” قاموا بإغلاق الصفحة نهائيا.

ماصاج ودعارة..

في كروب “المغربيات أجمل نساء” الكون دخلات سيدة كتقول باللي عندها محل ديال المساج وهي في الحقيقة كتستغل البنات للدعارة مع الخلجيين. كشفوها البنات وشوهوها فقامت بإغلاق الحساب.

هجوم على الفنانين..

الهجوم على الفنانين من طرف كروب “كيد المغربيات” جاب ليهم أزيد من 30 ديديكاس من طرف الفنانين والمشاهير.

قيام الليل وسعد المجرد..

واحد البنت دارت فكروب “المافيا المغربية” منشور كتطلب فيه البنات يديرو قيام الليل ويدعيو الله باش يخرج سعد المجرد من السجن في فرنسا.

سرطان وموت وفوكونط..

مغربية ادعت أنها مريضة بالسرطان وطلبات من البنات يتضامنوا معها، ومن تقال أنها ماتت والبنات دارو حداد في كروب “المغربيات أجمل نساء الكون”. في الأخير طلعات فوكونط وصاحبة الصور تونسية خدامة مضيفة طيران وحية ترزق.