من بعد “زعزع” المغربي، اللي عطاه الرابور توفيق حازب، المعروف ب”البيغ”، لمجموعة ديال روابا فالمغرب، الرابور “مستر كرايزي” كان أول واحد رد على “البيغ” عن طريق “تراك” بعنوان “بيغ شوت”، اللي حطو اليوم الاثنين (24 دجنبر) على قناته على يوتيوب.
مستر كرايزي وتقليد توباك شاكور
“مستر كرايزي” حاول يلعب دور مغني الراب الأمريكي “توباك شاكور”، حيث خذا الموسيقى ديال الأغنية الشهيرة ديالو “هيت إم آب” واللي كلاشا فيها توباك المنافس ديالو الأمريكي “بيغي”، واللي الرابط بينو وبين “البيغ” ديال المغرب هو الوزن والتقارب في الأسماء.
الصورة مأخوذة من إيمينيم
وحتى الصورة ديال “التراك” كانت منقولة من أغنية سابقة ديال مغني الراب الأمريكي “إيمينيم”، واللي كلاشا فيها المنافس ديالو “كان كيلي”، مع إضافة جملة “إنا لله وإنا إليه راجعون” في إشارة إلى أنه غادي يقتل “البيغ” بهاد التراك.
“البيغ باع الماتش”
“مستر كرايزي” ركز بزاف على أن “البيغ” باع الماتش، وبأنه ما بقاش كيعاير الحكومة كيف قبل، وكيقول في الأغنية باللي شراه حزب الاتحاد الاشتراكي، في إشارة لواحد الحفل كان دارو قبل سنوات.
كيفتخر براسو
وحاول “مستر كرايزي” يوصل رسالة باللي الأغاني ديالو وصلاتو للحبس، وباللي ما نادمش عليها، وباللي ما قبلش يتقارن بالروابا الآخرين اللي جمعهم معاه البيغ ف”170 كج”، وقال أنه ما عاونوا حتى شي واحد فالمسيرة ديالو، وخدم راسو براسو.
تهديد “البيغ”
وبالإضافة لهاد الرسائل، “مستر كرايزي” هدد “البيغ” مباشرة وقاليه باللي يلا شدو فالزنقة غادي يضربوا، وقاليه باللي العياقة مورا الميكرو ما نافعاش، وفالمباشر ما غادي ينفعوا لا قانون لا بوليس.
