محمد المبارك
لايف ومناقشة لمواضيع حساسة في المجتمع على طريقة الراديو، ولكن هاد المرة فالفايس على المباشر والفيديو. في أقل من أسبوع قدرات توصل 16 ألف متابع على صفحتها و6000 مشاهد على المباشر.
أمال كاسي من مواليد مدينة مكناس في 22 أكتوبر 1991. من بعد ما خدات الباك ديالها في المغرب قررت تكمل حياتها في بلاد المهجر وبالضبط مدينة إشبيلية بإسبانيا، و قرات المسرح وخدمات فالمجال الفني.
علاقتها مع الفايس بدات ف2010، وكانت مجرد فايسبوكية عادية، كتدخل تتابع صفحات على الفايس.
في هاد العام دخلات فكروب خاص بالبنات اللي اسمو “الحنونات”، مولاتو شخصية مشهورة جدا هي لبنى أبيضار، وتما قالت ليها لبنى باللي غدي تكلف بهاد الشي ديال اللايفات ويبداو يعيطو ليها لبنات ويعاودو مشاكلهم ويتبادلو النصائح.
اللايف لقى تفاعل، ولكن بما أن الكروب العدد ديال لبنات اللي فيه ما فايتش 2400 بنت كانوا دائما الآراء محدودة، وجات الفكرة أنه “لالة قيلوشة”، وهذا هو اللقب ديال آمال كاسي، تدير هاد اللايف في الصفحة ديالها.
بدات وهضرات على التحول الجنسي، ومن بعد هضرات على الخيانة الزوجية، ثم هضرات على الإلحاد، وآخر فيديو كان على التحرش الجنسي ولقى إقبال الكبير .
طريقة عمل اللايف هي كيطلع شي واحد عندها في المباشر، وكيعطي رأيو وكيحكي شنو وقع ليه، ولاقت هاد الطريقة استحسان كبير عند الناس، حيث هنا كيعبروا على أنفسهم بكل أريحية. وبطبيعة الحال كانوا انتقادات وكانوا اللي ما عجبهمش هاد الشي، حيث قالوا هاد المواضيع حشومة وعيب نهضرو فيهم وحنا في بلد إسلامي محافظ، وباللي آمال كاسي حيث عايشة في إسبانيا كتحاول تدخل هاد المصطلحات والمفاهيم لعندنا.
